មន្ត្រីខណ្ឌ៧មករាម្នាក់ ត្រូវបានដកបញ្ឈរជេីង និងផ្អាកមិនផ្តល់ប្រាក់ខែ៦ខែ ក្រោយប្រេីហិង្សាលេីបុរសអ្នករេីសអេតចាយម្នាក់..!!!

ភ្នំពេញ៖ករណីមន្ត្រីសាលាខណ្ឌ ៧មករា ម្នាក់ ដែលបានប្រេីហិង្សាលើអ្នករើសអេតចាយ នៅថ្ងៃទី៣ ខែវិច្ឆិកា ឆ្នាំ២០២២នោះ ត្រូវបានបញ្ឈរជើង និងផ្អាកមិនផ្ដល់ប្រាក់ខែចំនួន ៦ខែ ផងដែរ។ ក្នុងករណីនេះបានធ្វេីឡេីងបន្ទាប់ពីមានការរិះគន់យ៉ាងខ្លាំង ខណៈដែលខ្លួនជាមន្ត្រីមានអំណាច ហេីយទៅប្រេីហិង្សាលេីបុគ្គលតូចតាច និងគ្មានគំនិតក្នុងការនិយាយគ្នាដេីម្បីរកដំណោះស្រាយក្នុងរឿងតូចតាច។

យោងតាមការឱ្យដឹងពីរដ្ឋបាលខណ្ឌ៧មករា បានឱ្យដឹងថា នៅថ្ងៃទី៣ ខែវិច្ឆិកា ឆ្នាំ២០២២ វេលាម៉ោង ១៥:៣០នាទី ក្រុមការងារចំនួន ៤នាក់ បានចុះរៀបចំសណ្តាប់ធ្នាប់ចរាចរណ៍លើកំណាត់ផ្លូវលេខ១៦៤ ក្នុងសង្កាត់វាលវង់ ខណ្ឌ៧មករា ដែលមានការចតយានជំនិះ រទេះអេតចាយ និងរទេះលក់ទំនិញ ផ្សេងៗលើទ្រូងថ្នល់នៃកំណាត់ផ្លូវនេះ។

ក្នុងកំឡុងពេលនៃការរៀបចំសណ្តាប់ធ្នាប់នេះ ក្រុមការងារបានផ្សព្វផ្សាយ ណែនាំតាមឧឃោសនសព្ទឱ្យម្ចាស់យានជំនិះ និងរទេះដែលចតលើកំណាត់ផ្លូវ១៦៤ ឱ្យយកយានជំនិះ និងរទេះរបស់ខ្លួនចេញ ដើម្បីសម្រួលដល់ការធ្វើចរាចរណ៍បានល្អប្រសើរ។

រំពេចនោះក៏មានយុវជនម្នាក់ដែលជាម្ចាស់រទេះអេតចាយ បានធ្វើសកម្មភាពជេរប្រមាថលើក្រុមការងារដោយមិនព្រមយករទេះចេញពីលើទ្រូងថ្នល់ ហើយពេលនោះក្រុមការងារក៏បានព្យាយាមនាំយករទេះ និងយុវជនម្នាក់នោះមកអប់រំ។ ប៉ុន្តែយុវជនជាម្ចាស់រទេះអេតចាយនោះមិនព្រម ថែមទាំងបន្តជេរប្រមាថលើក្រុមការងារ ក៏បានកើតមានការប្រតាយប្រតប់គ្នាទៅវិញទៅមករហូតដល់មានការប្រើអំពើហិង្សារបន្តិចបន្ដួច។

ក្រោយកើតហេតុ រដ្ឋបាលខណ្ឌ៧មករា បានជួបជាមួយយុវជនជាម្ចាស់រទេះអេតចាយ ជាមួយគ្នានោះដែរយុវជនរូបនោះ បានសុំទោស និងទទួលស្គាល់កំហុស ហើយមិនមានការប្តឹងផ្តល់អ្វីឡើយ។

ចំពោះមន្ត្រីដែលបានប្រព្រឹត្តកំហុស ឈ្មោះ ឆាំ ឆាន រដ្ឋបាលខណ្ឌបានធ្វើការអប់រំ និងដាក់ពិន័យដោយបញ្ឈរជើង ផ្អាកប្រាក់ខែរយៈពេល ៦ខែ និងដាក់ពិន័យ ទៅតាមច្បាប់ ព្រមទាំងលិខិតបទដ្ឋានគតិយុត្តជាធរមាន៕